楼主

随嗒， 55岁， 170cm， 香港 香港

发布于2021-11-09 09:02

今日，想同众损友讲下「爱情」呢两个字。
我想讲关于爱情嘅第一样嘢就系，你从来唔知佢会几时出现，有人十零岁就已经揽头揽颈，拍拖拍到天昏地暗，有人五六十岁依旧孑然一身。
爱情，就好似一种流行性感冒咁，既然防不胜防，倒不如早啲做定预防措施好。
以下就系我要讲嘅爱情忠告。
1.一见钟情，系好多年轻人会遇上嘅情形，而且仲唔系一两次，而系好多次，分分钟坐一程地铁，你会一见钟情几次添，原因系你呢个时候，对爱情有无限幻想，对爱人有无限期待，一见到个样貌身形稍为合眼缘嘅，就会认为已经搵到一生中最爱，但其实系唔系呢？喺呢个好似好吸引嘅异性背后，你又知几多呢？如果最后认识唔到，又需唔需要唔开心呢？以上问题，都系我要你自己好好反思一下嘅！
2.虽然，人人拍拖都可能会先以外形嚟判定自己锺唔锺意对方，不过，外形系会随时日同健康状况而有所改变，如果有一日，你最爱嘅佢变成另一个样，你仲锺唔锺意佢呢？假如答案系肯定嘅话，咁恭喜你，你的确好喜欢对方，不过，如果你嘅答案系唔肯定嘅话，咁我建议你再检讨一下呢段感情。
3.一个人两条心未为多，呢句话，好多人都讲过，尤其喺到某个年纪，未必好快就会肯同一个人稳定落嚟。本来，人拣你，你拣人，系好平常嘅事，只不过，你应该畀对方知道，佢暂时仍然未系你嘅唯一，因为你仲想睇多啲呢个世界，千祈唔好畀佢一个错觉，认为大家已经默许终身，因为万一真系分手，或者畀佢发现你仲有第二个伴侣，佢承受嘅打击一定好大，而你，要负嘅责任亦最大。
4.爱情大过天，系好多年轻人嘅态度。其实，有一样嘢系一定比爱情重要，呢样嘢就系你嘅学业。
世界上无十足把握嘅爱情，但系就有肯定回报嘅努力。只要你肯付出时间同心机，你就会得到一定嘅好成绩。
最重要一点系，乜嘢年纪都可以拍拖，但系你有无见过一个三十岁嘅人去返小学？
读书嘅年纪，过咗就再搵唔番，请好好珍惜。
5.最后，如果遇上爱情挫折，请记着，全世界有几十亿人，依家只系一个唔锺意你啫，你嘅机会仲有数唔到咁多，与其自暴自弃，倒不如买几件靓衫，执番好个样，静待下一次嘅缘份仲好，而且，如果爱情系似一场流行性感冒嘅话，你依家已经有咗一定嘅抵抗力嘞，系唔系更加值得开心呢？

发表评论（0）