楼主

老愚公， 71岁， 170cm， 上海 闵行

发布于2014-06-11 11:13

身在异乡甚感寂寞，朋友从网上发过来几本PDF连环画，看到迭些老眼熟的小人书，一记头就想起来阿拉老早看迭些书的辰光。

老小格辰光，阿拉小学堂门口有2家小人书摊头，侪是夫妻老婆店。伊拉门口侪放了几根老矮咯长板凳，看书咯人可以坐下来看书。模模糊糊记得，有一家书摊，屋里厢几个小囡，跟阿拉年纪差不多，好像搭阿拉是一个小学里，但伊拉平常浪向，侪伐跟阿拉白相咯。

仂海伊拉书摊里厢，侬只要花1分洋钿，就可以看一本小人书。如果是新上市的书，就要2分洋钿一本哦。老板生意经老好咯。伊奈小人书的封面拆下来，奈迭些花花绿绿咯封面，一排排，整整齐齐，贴到门板浪向作为招贴。凡是新书封面，奈伊贴了顶顶抬眼落睛咯地方，老远侪可以看到咯。所以人家走过，看到书摊浪向，总关侪是新的小书。伊拉噱头势老好咯。
格么老的或者是旧咯书呢，伊就放到里厢去了。假使侬晓得格些老的书，侬可以问老板，伊就会从里厢奈出来给你。所以讲，侬如果欢喜看书，就要经常去格里看看，有啥格侬自家欢喜格书。有辰光长久勿去了，书名也讲勿出，奈能寻得到书啊。

因为迭格辰光，阿拉人老小咯，袋袋里厢呒没啥铜钿，只好立海放夜学后，暗簇簇咯，立了浪小书摊门前，瞄瞄书的封面，解解馋。假使讲立格辰光长了一点，卜了老板娘看见，伊就会过来赶阿拉。讲啥格，侬不要老是立咧咯哒，又不看书唠，奈阿拉生意侪档牢了。听到老板娘发条头，阿拉只好嘎仔嘎眼走开。

有格辰光，阿拉有要好同学有铜钿了，叫阿拉一道去。阿拉就面皮老老，跟伊一道去。但是迭辰光自家只好在傍边看，因为是伊出格钞票，阿拉是揩揩油咯，所以按规矩是伊奈牢书，阿拉只好坐在傍边斜着看。伊看好了就翻，阿拉只好跟牢伊格速度看。有辰光伊看得老快咯，阿拉来啊来不及看，不好意思，只好叫伊再翻过来。迭咯辰光，伊就会发条头，侬哪能看得加慢啊！

有辰光，同学看得老蛮咯，佛晓得伊哪能看得加慢咯。等阿拉奈字老啥，侪不晓得读了几遍了，伊还呒没翻过起。迭格辰光，等了浪旁边，心里厢啊，急是急得来不得了，有啥办法啊。有辰光只好嘲嘲伊，侬奈能看得加慢啊！

侬要是坐了傍边看书，甭仔老板或者是老板娘看见格样子，伊要来赶阿拉咯。讲“一分洋钿一本，只好一个人看哦！”

等难板自家有了几分洋钿，阿拉牢勿舍得用咯。捏牢仔角子在小书摊门前要兜好几天。先到小书摊去看看有啥格书，等一席席，再去看看，比较比较还有啥自家顶顶欢喜看格书，要经过几次比较，侪舍得花迭点铜钿啊。当然牢，自家有点铜钿去格辰光，也要叫浪同学一道去格。迭格不好老小气咯，否则人家以后也不带侬一道去看格。

格么有点铜钿就不一样了，走到小书摊门前头，也不怕老板娘来咋呼了。有辰光碰到伊，还要乘机还她一下，解解怨气，叫做“一包还一包“。阿拉有辰光就等伊讲出来”走开、走开，侬又没钞票牢“格句闲话，马上就还伊一记：”侬哪能晓得阿拉没钞票啊 “！讲讲就往矮凳上一坐，叫一声：格本《长坂坡》（三国演义中专讲常山赵子龙的故事，阿拉老欢喜看咯，后来自家去买了一本）搭我奈过来！伊朝侬看看，问一声，钞票带来伐？听讲有钞票咯，伊就一点办法也呒没，只好去奈。

发表评论（1）